हरिः ओम्

Sloka Text in Telugu , Kannada, Gujarati, Devanagari, English

|| Om tat sat ||

સુન્દરકાણ્ડ્
અથ એકોનવિંશસ્સર્ગઃ

તસ્મિન્નેવ તતઃ કાલે રાજપુત્ત્રી ત્વનન્દિતા|
રૂપયૌવનસંપન્નં ભૂષણોત્તમ ભૂષિતમ્||1||

તતો દૃષ્ટ્વૈવ વૈદેહી રાવણં રાક્ષસાધિપં|
પ્રાવેપત વરારોહા પ્રવાતે કદળી યથા||2||

અચ્ચાદ્યોદરમૂરુભ્યાં બાહુભ્યાં ચ પયોધરૌ|
ઉપવિષ્ટા વિશાલાક્ષી રુદન્તી વરવર્ણિની||3||

દશગ્રીવસ્તુ વૈદેહીં રક્ષિતાં રાક્ષસીગણૈઃ|
દદર્શ સીતાં દુઃખાર્તાં નાવં સન્નામિવાર્ણવે ||4||

અસંવૃતાયાં માસીનાં ધરણ્યાં સંશિતવ્રતાં
છિન્નાં પ્રપતિતાં ભૂમૌ શાખામિવ વનસ્પતેઃ||5||

મલમણ્ડિન ચિત્રાઙ્ગીં મંડનાર્હાં અમણ્ડિતામ્|
મૃણાળી પઞ્કદિગ્ધેવ વિભાતિ ન વિભાતિ ચ||6||

સમીપં રાજસિંહસ્ય રામસ્ય વિદિતાત્મનઃ|
સઙ્કલ્પહયસંયુક્તૈઃ યાન્તીમિવ મનોરથૈઃ||7||

શુષ્યન્તીં રુદતીં એકાં ધ્યાનશોકપરાયણામ્|
દુઃખ સ્યાન્તં અપશ્યન્તીં રામાં રામં અનુવ્રતામ્||8||

વેષ્ટમાનાં તથઽઽવિષ્ટાં પન્નગેન્દ્રવધૂમિવ|
ધૂપ્યમાનાં ગ્રહેણેવ રોહિણીં ધૂમકેતુના||9||

વૃત્તશીલકુલેજાતાં આચારવતિ ધાર્મિકે|
પુનસ્સંસ્કારમાપન્નાં જાતા મિવ દુષ્કુલે||10||

અભૂતેનાપવાદેન કીર્તિં નિપતિતા મિવ|
અમ્નાયાનાં અયોગેન વિદ્યાં પ્રશિથિલામિવ||11||

સન્નામિવ મહાકીર્તિં શ્રદ્ધામિવ વિમાનિતામ્|
પૂજામિવ પરિક્ષીણાં આશાં પ્રતિહતામિવ||12||

અયતીમિવ વિધ્વસ્તાં આજ્ઞાં પ્રતિહતામિવ |
દીપ્તામિવ દિશં કાલે પૂજાં અપહૃતા મિવ||13||

પદ્મિનીમિવ વિધ્વસ્તાં હતશૂરાં ચમૂમિવ|
પ્રભામિવ તમોધ્વસ્તાં ઉપક્ષીણામિવાપગામ્||14||

વેદીમિવ પરામૃષ્ટાં શાન્તાં અગ્નિશિખામિવ|
પૌર્ણમાસી મિવ નિશાં રાહુગ્રસ્તેન્દુમણ્ડલામ્||15||

ઉત્કૃષ્ણપર્ણકમલાં વિત્રાસિત વિહઙ્ગમાં|
હસ્તિ હસ્તપરામૃષ્ટાં આકુલાં પદ્મિનીમિવ||16||

પતિશોકતુરાં શુષ્કાં નદીં વિસ્રાવિતામિવ|
પરયા મૃજયા હીનાં કૃષ્ણપક્ષ નિશામિવ||17||

સુકુમારીં સુજાતાઙ્ગીં રત્નગર્ભગૃહોચિતામ્|
તપ્યમાનામિવોષ્ણેન મૃણાળી મચિરોદ્ધૃતામ્||18||

ગૃહીતા માળિતાં સ્તમ્ભે યૂધપેન વિના કૃતાં|
નિશ્શ્વસન્તીં સુદુઃખાર્તાં ગજરાજવધૂમિવ||19||

એકયા દીર્ઘયા વેણ્યા શોભમાનાં અયત્નતઃ|
નીલયા નીરદાપાયે વનરાજ્યા મહીમિવ||20||

ઉપવાસેન શોકેન ધ્યાનેન ચ ભયેન ચ|
પરીક્ષીણાં કૃશાં દીનાં અલ્પાહારાં તપોધનામ્||21||

અયાચમાનાં દુઃખાર્તાં પ્રાઞ્જલિં દેવતામિવ|
ભાવેન રઘુમુખ્યસ્ય દશગ્રીવ પરાભવમ્||22||

સમીક્ષમાણાં રુદતીમનિન્દિતાં
સુપક્ષ્મ તામ્રાયત શુક્લલોચનામ્|
અનુવ્રતાં રામમતીવ મૈથિલીં
પ્રલોભયામાસ વધાય રાવણઃ ||23||

ઇત્યાર્ષે શ્રીમદ્રામાયણે આદિકાવ્યે વાલ્મીકીયે
ચતુર્વિંશત્ સહસ્રિકાયાં સંહિતાયામ્
શ્રીમત્સુન્દરકાણ્ડે એકોનવિંશસ્સર્ગઃ||

||ઓં તત્ સત્||